بحبك يا مصر

بحبك يا مصر
كتب -

قصيدة للشاعر أحمد أبو عباس – قرية المصالحة بنجع حمادي

وافديكي بروحي ودمي

بحبك يا مصر

وأنا شايل فوق كتافي همي

شايفك في الدنيا وردة

بس ضايعة مني

زارعك بين ضلوعي

وراويكي بدمي

وأنا لسه واقف ومستني

ومتمني ترجعي وتحكيلي

وتسمعي لمواويلي

وتقوليلي أسمعلك

وأندهلك وأحكيلك

وأشكيلك تسمعيلي

أنا اللي عشت على ترابك

وأنا اللي بدق على بابك

وأنا اللي أتعذبت بعذابك

أنا اللي بحبك

وأنا اللي عايش جوا قلبك

من غير عيش من غير طعام

أنا الغلبان وأنا الجعان

وأنا الشحات وأنا الجبان

جوا قلبك

إزاي بحبك

وأنا صوتي فيكي مش مسموع

وأنا المخدوع وأنا الموجوع

وأنا اللي ميت من الجوع

وأنا غريب النوع

وكل مافي الموضوع

إني بحبك

ولا اللي يحبك

يبقى معيوب

أنا من اللي فيكي مغلوب

وشايف كل شيء فيكي مقلوب

وإيه المطلوب

يعني أقولك بحبك

وكرباجك فوق ضهري بيقتلني

ده أنا لو قولتلك بحبك

تبقى طالعة غصب عني

وازاي أكرهك

وأنتي حتة مني

وانتي دموع بكايا

وأنتي صوتي لما ليكي أغني

انتي معايا نسيم هوايا

وجوا قلبي دوايا ودمي

ورغم غلبي وهمي

بحبك يا مصر

وحبك حيرة وغيرة

وأحزان ماليها الخوف

وقلبك أعمى مش بيشوف

اللي بات فيكي مكفوف

عمياه الكفوف

ينعل أبو الظروف

اللي تخلي حلمي

مكسوف يراود خيالي

طالما انتي في بالي

بتزيدي همك

وتزيدي حملك على حمالي

وأنا اللي بقالي

شوية كلام في خيالي

وشوية جراح على حبة آلام

وورقة وقلم

اكتب اسمك

وارسم نفسي جوا حضنك

لما اكون محتاجلك

وأنا جنبك في قربك

لما تكوني محتاجالي

أفرح لفرحك

وأحزن لجرحك

أنا اللي بشتاقلك

وأنا اللي بحتاجلك

وأنا اللي بقولك

بصوت عالي

بحبك يا مصر بحبك يا مصر

الوسوم