من واقع آخر عود كبريت.. لمحمد ناجي

من واقع آخر عود كبريت.. لمحمد ناجي محمد ناجي

من واقع آخر عود كبريت

شعر – محمد ناجي

باقي في علبة..

عليها بواقي نقط الزيت

متشالة هناك

فوق آخر رف لمطبخ بيت..

والدنيا هدوء

بعد ما راحوا الناس للسوق

بيفكر

برغم إن مزاجه متعكر

ما بين الهالك والمشطوط

قدر مربوط

ما بين عود بيباصي الولعة لعود

دخان فاتح من غير صوت

أعواد وقلوب مرمية هناك

قدرها على الأرض تموت

وبرغم إنه مجرد عود

مستعجل قوي أمتى يعود

ويادي في يوم دوره

كان نفسه في أيد مرة تزوره

وتملي بيصبر نفسه

يمكن متشال لعيون حد حسود

العود مجبور في العلبة اتحط

كان عود كبريت نفسه يفضفض

يرتاح لو يوم انشط..

كان نفسه يشوف شكل العلبة

ويمر توالي على نفس الخط

عمال يتنطنط

بيشخبط أوي بجنون

كان عود مسجون

برة الكون

جوة العلبة

كان أكتر عود لو شم شياط

يعمل هيصة وجلبة

كان أكتر واحد مظلوم

ووحيد في بعاد..

كان أكتر عود كبريت

برغم أنه المطفي

جواه انقاد

الوسوم